تقرير بقلم : محمد رضا
كاتب ومدرب تنمية بشرية
أول عرض جماهيري لأول فلم تجاري بالسعوديه
فلم مناحي يوم امس الثلاثاء
ياشباب .. ويابنات
اخيرا صار عندنا سينما
ولو انه بس فترة العيد الين يوم 20
لكن اخيرا صار الحلم حقيقة
الفلم حلو وخفيف وكوميدي
يعني زي افلام هنيدي واحمد حلمي وكده
بس بنفس الوقت ماهو الفلم اللي ممكن يروق للفئة النخبوية
اللي تبغى شي زي المصير والرسالة وعمر المختار
لكن بالنهاية بصراحة حاجه تشرف
المنظر امس لو تشوفوا الزحام غير الطبيعي
طبعا الرجال لحال والحريم أو النساء لانه حريمنا بيحبوا نناديهم نساء لحال هههههه
بس في حاجه تستغربوها بصراحة عندنا الحريم ينادوهم العوائل ما ينادوهم نساء
مدري كيف صاروا عيلة بدون رجل ما اكتملت العيلة
نادوهم نساء يا جماعة ترى كلمة نساء والله ماهي عيب
المهم
الزحمة كانت كبيرة
الكافتريا اللي تبيع الفشار والذرة ماهي ملحقة على الزباين
كل الناس تبغى تشتري ماهي مصدقه
ثقافة السينما ماكانت موجوده الناس تتضارب مين يجلس قدام هههههه
احلى شي اول ما انقفل النور
الكل قعد يصفق
لاول مره ادخل فلم بحياتي والناس تصفق لمن ينطفي النور
لكن اغلاق الانوار كان الاعلان الرسمي انه اول خطوة عملية للسينما
شكرا لكل الناس اللي بدت مشروع السينما عندنا
من يوم ما كان مهرجان جدة للافلام السينمائية القصيرة بدورتيه السابقتين
الى اول عرض تجاري بفترة العيد
وشويه شويه انشالله نصير زي العالم
السينما حتفتح وظايف للخلق وحتكون باب رزق ونشر ثقافة وتعارف بين الناس
ومكان جديد نقضي فيه اوقات فراغنا
يعني من جد ندفع التلاتين ريال نشتري بيها تذكرة ووجبة خفيفة بالسينما في الويك اند
ونحس اننا غيرنا جو بطريقة ايجابية وبدون ما نضايق ونزعج احد
دا حتى الناس حتكون مطمنة على اولادهم وبناتهم
جالسين بالسينما
بدل اللفلفة في الاسواق والقهاوي
يلا لا تفوتوا الفرصه عندكم قرابة العشرة ايام
كل واحد في جدة يروح يتفرج الفلم التذكرة ب 15 ريال بأبرق الرغامة
اللي ما يعرف العنوان
الطريق السريع بدل ما تروحوا من شارع الملك عبدالله على نحية السليمانية روحوا الجهة الثانية
تلاقوا مبني كبير فيله مجسم لعلم المملكة وأنوار هذا هوا المبنى
وقفوا سيارتكم واطلعوله
الأحد أكتوبر 03, 2010 9:58 am من طرف عاشق الصمت
موضوع: عرض فيلم مناحي في جدة والطائف 